Д-р Доне ГЕРШАНОВСКИ, редовен професор (во пензија), е роден на 18.3.1949 во с. Покрвеник, Ресенско. Завршил гимназија во Ресен во 1968 г. Во 1973 се здобил со високо образование дипломиран инженер по физика на Институтот за физика, ПМФ – Скопје. Постдипломски студии завршил во 1981 г. на Институтот за физика. Во 1985 г. ја одбранил докторската дисертација под наслов „Испитување на катјонски комплекси на ДНК со оптички и електрооптички методи“. Во 1974 г. е избран за асистент на Институтот за физика при ПМФ, во 1986 г. за доцент, во 1991 г. е избран за вонреден професор, а во 1996 г. е избран за редовен професор. Одржувал настава по предметите: атомска физика, оптика и нуклеарна физика со физика на елементарните честици, биофизика за студентите на Медицинскиот факултет, настава на постдипломските студии по физичка оптика. Главни подрачја на научен интерес му се оптика и електрооптика, јонизирачки зрачења, дозиметрија и заштита. Досега има објавено 48 научни и 47 стручни трудови, од кои 9 во списанија надвор од Македонија. Најзначајни објавени научни трудови: 1) D. Gersanovski, C. Houssier, P. Colson, Terbium as a probe of Nucleic acid structure, Bioch. Bioph. Acta, Elsev. Sc. Publ, 00, 1985, 313323; 2) D. Gersanovski T Anovski, L. Cvetanovska, Contribution to determination of content of Uranium and Thorium in ore samples from Allchar (Macedonia), „N. Jb. Miner. Mh“. Abh. Stuttgart, 1994; 3) D. Gersanovski, T Delipetrov, Uranium contents in rock samples from Allchar and Podares Mines (Macedonia), Phdzsica Mecedonica, 50, 97-102 (2000); 4) D. Gersanovski, R. Jacimovic, Determination of Uranium and Thorium content in some minerals from Mariovo, R. Macedonia) bdz k0-instrumental neutron act. analdzsis, Phdzsica Macedonica, 51, 43-50 (2001). На научни манифестации досега има презентирано (усно или постерски) вкупно 22 научни трудови, од кои 11 надвор од Македонија. Автор е на 3 универзитетски учебници и учебни помагала и на 4 средношколски учебници. Бил главен уредник на научното списание Physica Macedonica од 2001 до 2003 г., раководел со 7 научноистражувачки проекти, од кои 4 биле меѓународни. Во 1983 г. престојувал 10 месеци на Универзитетот во Лиеж (Белгија); во 1984 г. три месеци во Институтот за медицински истражувања во Загреб; во 1985 и во 2003 г. по еден месец во Меѓународниот институт за теориска физика во Трст; во 1987 г. на Физичкиот факултет при Универзитетот во Софија. Во 1988 г. имал двонеделен престој на Институтот за физика при Јагелонскиот универзитет во Краков, во 1998 г. студиски престој на „Universite Catholique de Louvain“, во 2000 г. едномесечен студиски престој на „Universite de Caen“, Basse – Normandie и во 2003.
Професорот Гершановски бил раководител на Заводот за оптика и спектроскопија при Институтот за физика, Раководител на Институтот за физика, ПМФ, од 1999–2001 г., а во периодот од 1995 до 1997 г. бил продекан на Природно-математичкиот факултет. Член бил на државната комисија за заштита од јонизирачки зрачења; член на Меѓународниот одбор на ТЕСЛА акцелераторски систем, „Винча“, Белград (1998–2000) итн. Бил избран за декан на Природно-математичкиот факултет во мандатниот период 2009–2012 г. Во академската 2012/13 г. реализирал престој на Универзитетот во Хјустон, Тексас. Поседува активно знаење на францускиот и англискиот јазик, пасивно на рускиот јазик.
